لا عمرى رحت المصايف
ولا أعرف طريقهم فين
باسمع يادوبك عنهم
فى الراديو والجرانين
ما انا زى أهل البلد
وايش يعملوا المساكين
غلطت مرة فى حياتى
ورحت راس البر
يومها الدنيا شتت
بعد اما كانت حر
واتلبدت بالغيوم
واستحلفت بالشر
يابحر مالك كده
هايج وليه غضبان
مايوه بكينى وصل
وعشان كده زعلان
على بلاج المصارف
مشتانا ومصيفنا
والشمس دى أمنا
عرفناها وتعرفنا
وحدانا كازينو المصاطب
على قد ما عرفنا
يحلى عليها السهر
ونقول ياليل ياعين
يوحشنى صوت الجاموس
لو غبت عن بلدى
واشتاق لقرص الناموس
بالليل يا ولدى
محلاه فى ساعة العشا
لما يزن يا وعدى
والهم مارضيش
بنا مع اننا راضيين
باقوله ليه ياناموس
ماتروحش ع البلاجات ؟
تقرص فى جلد العرايا
وتنول الأجر والحسنات
قاللى ماقدرش اسيبك
ياعم ده احنا اخوات
بين التلول والبرك
طول عمرنا عايشين
اقرص ومص وهيص
فى دمنا يا ناموس
واحنا رغيف الدرة
ما بنلاقيله غموس
وغيرنا قاعدين هناك
بيبعزقوا فى فلوس
ما اهو اصل انا م العزب
وجدودى فلاحين
ليست هناك تعليقات:
إرسال تعليق